بارہویں جماعت · مطالعہ قرآنِ حکیم · خیبر پختونخوا ٹیکسٹ بک بورڈ

باب 10: سبق 10: سورہ النور — مشقی سوالات

تیارمختصر جوابات، تفصیلی جوابات، سرگرمیاں اور شان نزول · 21 سوالات

حل کی زبان:اردو

1 / 21

فہرستِ سوالات 1 / 21

مختصر جوابات 6

تفصیلی جوابات 6

سرگرمیاں 5

شان نزول 4

متن کا حجم

واٹس ایپ پر بھیجیں

ایک ڈاؤن لوڈ میں ایک باب۔ پڑھنے پر کوئی حد نہیں، صرف تھوک ڈاؤن لوڈ پر ہے۔

مختصر جوابات

1 مختصر جوابات

فِي بُيُوتٍ أَذِنَ اللَّهُ أَن تُرْفَعَ وَيُذْكَرَ فِيهَا اسْمُهُ يُسَبِّحُ لَهُ فِيهَا بِالْغُدُوِّ وَالْآصَالِ

آیت 36: مساجد کے حوالے سے فرمانِ الہیٰ کیا ہے

ترجمہ

(یہ نور) ان گھروں (مساجد) میں ہے جن کے بلند کرنے اور جن میں اپنے نام کی یاد کیے جانے کا اللہ نے حکم دیا ہے، ان میں صبح و شام اس کی تسبیح کی جاتی ہے۔

مساجد کے حوالے سے حکم:

1 اللہ نے مساجد کی قدر و منزلت کو بلند کرنے کا حکم دیا ہے۔

2 مساجد کو اللہ کے ذکر اور صبح و شام تسبیح و عبادت کے لیے مخصوص کرنے کا فرمايا ہے۔

2 مختصر جوابات

أَلَمْ تَرَ أَنَّ اللَّهَ يُسَبِّحُ لَهُ مَن فِي السَّمَاوَاتِ وَالْأَرْضِ وَالطَّيْرُ صَافَّاتٍ ۖ كُلٌّ قَدْ عَلِمَ صَلَاتَهُ وَتَسْبِيحَهُ ۗ وَاللَّهُ عَلِيمٌ بِمَا يَفْعَلُونَ

آیت 41: آیت کے مطابق کون اللہ کی تسبیح میں مصروف ہے؟

ترجمہ

کیا تم نے نہیں دیکھا کہ جو کوئی بھی آسمانوں اور زمین میں ہے، اللہ ہی کی تسبیح کر رہا ہے، اور پرندے بھی پر پھیلائے ہوئے؟ ہر ایک اپنی نماز اور تسبیح کا طریقہ جانتا ہے، اور اللہ ان کے کاموں سے خوب واقف ہے۔

تسبیح میں مصروف مخلوقات:

1 آسمانوں اور زمین کی تمام مخلوقات اللہ کی تسبیح کر رہی ہیں۔

2 ہوا میں پر پھیلائے اڑنے والے پرندے بھی اللہ کی پاکی بیان کرنے میں مصروف ہیں۔

3 مختصر جوابات

أَلَمْ تَرَ أَنَّ اللَّهَ يُزْجِي سَحَابًا ثُمَّ يُؤَلِّفُ بَيْنَهُ ثُمَّ يَجْعَلُهُ رُكَامًا فَتَرَى الْوَدْقَ يَخْرُجُ مِنْ خِلَالِهِ وَيُنَزِّلُ مِنَ السَّمَاءِ مِن جِبَالٍ فِيهَا مِن بَرَدٍ فَيُصِيبُ بِهِ مَن يَشَاءُ وَيَصْرِفُهُ عَن مَّن يَشَاءُ ۖ يَكَادُ سَنَا بَرْقِهِ يَذْهَبُ بِالْأَبْصَارِ

آیت 43: بادلوں اور بارش کے حوالے سے کیا قدرتِ الہیٰ بیان ہوئی ہے؟۔

ترجمہ

کیا تم نے نہیں دیکھا کہ اللہ بادل کو چلاتا ہے، پھر اسے آپس میں ملاتا ہے، پھر اسے تہہ بہ تہہ کر دیتا ہے، پھر تم دیکھتے ہو کہ اس کے درمیان سے مینہ (بارش) نکل رہا ہے، اور وہ آسمان سے (بادل کے) پہاڑوں میں سے اولے برساتا ہے، پھر جس پر چاہتا ہے اسے ڈال دیتا ہے اور جس سے چاہتا ہے اسے ہٹا لیتا ہے، اس کی بجلی کی چمک قریب ہے کہ آنکھوں کی بینائی لے جائے۔

بیان کردہ قدرت:

1 اللہ بادلوں کے ٹکڑوں کو آہستہ آہستہ چلاتا اور پھر انہیں آپس میں جوڑتا ہے۔

2 بادلوں کو تہہ بہ تہہ کر کے ان کے اندر سے بارش کی بوندیں برساتا ہے۔

3 آسمان میں بادلوں کے پہاڑوں سے اولے نازل کرتا ہے اور اس کی بجلی کی چمک آنکھیں خیرہ کر دیتی ہے۔

4 مختصر جوابات

وَمَن يُطِعِ اللَّهَ وَرَسُولَهُ وَيَخْشَ اللَّهَ وَيَتَّقْهِ فَأُولَٰئِكَ هُمُ الْفَائِزُونَ

آیت 52: نبی ﷺ کی اطاعت کا کیا انعام بیان ہوا؟

ترجمہ

اور جو کوئی اللہ اور اس کے رسول کی اطاعت کرے، اور اللہ سے ڈرے اور اس کی نافرمانی سے بچے، تو ایسے ہی لوگ کامیاب ہونے والے ہیں۔

اطاعت کا انعام:

جواب اللہ اور رسول ﷺ کی اطاعت، تقویٰ اور خوفِ خدا اختیار کرنے والوں کا انعام حقیقی کامیابی (فلاح) ہے۔

5 مختصر جوابات

اِذَا بَلَغَ الْأَطْفَالُ مِنكُمُ الْحُلُمَ فَلْيَسْتَأْذِنُوا كَمَا اسْتَأْذَنَ الَّذِينَ مِن قَبْلِهِمْ ۚ كَذَٰلِكَ يُبَيِّنُ اللَّهُ لَكُمْ آيَاتِهِ ۗ وَاللَّهُ عَلِيمٌ حَكِيمٌ

آیت 59: بچوں کے حوالے سے کیا معاشرتی ادب بیان ہوا؟ عربی ۔

ترجمہ

”اور جب تمہارے بچے بلوغت کو پہنچ جائیں تو انہیں بھی (گھر کے اندر آنے کے لیے) اسی طرح اجازت مانگنی چاہیے جیسے ان سے پہلے کے بڑے لوگ اجازت مانگتے رہے ہیں، اسی طرح اللہ تمہارے لیے اپنی آیات کھول کر بیان فرماتا ہے، اور اللہ خوب جاننے والا، حکمت والا ہے۔

معاشرتی ادب:

جواب جب بچے بالغ ہو جائیں تو انہیں گھر کے نجی کمروں یا بڑوں کے پاس آنے سے پہلے ہر وقت اجازت (استیذان) لینی چاہیے۔

6 مختصر جوابات

لَّا تَجْعَلُوا دُعَاءَ الرَّسُولِ بَيْنَكُمْ كَدُعَاءِ بَعْضِكُم بَعْضًا ۚ قَدْ يَعْلَمُ اللَّهُ الَّذِينَ يَتَسَلَّلُونَ مِنكُمْ لِوَاذًا ۚ فَلْيَحْذَرِ الَّذِينَ يُخَالِفُونَ عَنْ أَمْرِهِ أَن تُصِيبَهُمْ فِتْنَةٌ أَوْ يُصِيبَهُمْ عَذَابٌ أَلِيمٌ

آیت 63: رسول ﷺ کی مخالفت کا کیا انجام بیان ہوا؟ عربی ۔

ترجمہ

”تم رسول کے بلانے کو اپنے آپس میں ایک دوسرے کا سا بلانا نہ سمجھو، اللہ ان لوگوں کو خوب جانتا ہے جو تم میں سے (ایک دوسرے کی) آڑ لے کر چپکے سے سرک جاتے ہیں، پس ان لوگوں کو ڈرنا چاہیے جو رسول کے حکم کی مخالفت کرتے ہیں کہ کہیں ان پر کوئی آفت نہ آ پڑے یا انہیں دردناک عذاب نہ پہنچے۔

مخالفت کا انجام:

1 رسول ﷺ کے احکامات کی مخالفت کرنے والوں کو دنیا میں کسی بڑی آفت، فتنے یا آزمائش کا سامنا کرنا پڑ سکتا ہے۔

2 آخرت میں ان کے لیے دردناک عذاب کا انجام بیان کیا گیا ہے۔

تفصیلی جوابات

7 تفصیلی جوابات

رِجَالٌ لَّا تُلْهِيهِمْ تِجَارَةٌ وَلَا بَيْعٌ عَن ذِكْرِ اللَّهِ وَإِقَامِ الصَّلَاةِ وَإِيتَاءِ الزَّكَاةِ ۙ يَخَافُونَ يَوْمًا تَتَقَلَّبُ فِيهِ الْقُلُوبُ وَالأَبْصَار

آیت 37: اللہ کے بندوں کی کیا صفات اور ان کا اجر بیان ہوا ہے؟

ترجمہ

جواب۔ ”وہ ایسے مرد ہیں جنہیں کوئی تجارت اور خرید و فروخت نہ اللہ کی یاد سے غافل کرتی ہے، نہ نماز قائم کرنے سے اور نہ زکوٰۃ ادا کرنے سے؛ وہ اس دن سے ڈرتے رہتے ہیں جس میں (خوف کے مارے) دل اور آنکھیں الٹ جائیں گے

اللہ کے بندوں کی صفات:

1 ذکرِ الٰہی سے غفلت نہیں — دنیاوی کاروبار یا تجارت انہیں یادِ الٰہی سے دور نہیں کرتی۔

2 نماز اور زکوٰۃ کی پابندی — وہ فرض نمازوں اور مالی عبادات (زکوٰۃ) کو وقت پر ادا کرتے ہیں۔

3 آخرت کا خوف — ان کے دلوں میں قیامت کے اس ہولناک دن کا خوف رہتا ہے جس میں شدید گھبراہٹ سے آنکھیں پتھرا جائیں گی۔

8 تفصیلی جوابات

لِيَجْزِيَهُمُ اللَّهُ أَحْسَنَ مَا عَمِلُوا وَيَزيدَهُم مِّن فَضْلِهِ ۗ وَاللَّهُ يَرْزُقُ مَن يَشَاءُ بِغَيْرِ حِسَابٍ

آیت 38 ، ترجمہ و وضاحت کریں۔

ترجمہ

”تاکہ اللہ انہیں ان کے نیک اعمال کا بہترین بدلہ عطا فرمائے اور اپنے فضل سے انہیں مزید زیادہ دے، اور اللہ جسے چاہتا ہے بے حساب رزق دیتا ہے۔“

وضاحت

جواب اس آیت میں واضح کیا گیا ہے کہ جو لوگ دنیا کی چمک دمک کے باوجود اپنی ترجیح دین کو بناتے ہیں، اللہ تعالیٰ نہ صرف ان کے اعمال کا پورا پورا صلہ دیتا ہے بلکہ اپنے فضلِ خاص سے اس میں اضافہ بھی فرماتا ہے اور انہیں آخرت میں لامحدود نعمتوں سے نوازے گا۔

9 تفصیلی جوابات

وَالَّذِينَ كَفَرُوا أَعْمَالُهُمْ كَسَرَابٍ بِقِيعَةٍ يَحْسَبُهُ الظَّمْآنُ مَاءً حَتَّىٰ إِذَا جَاءَهُ لَمْ يَجِدْهُ شَيْئًا وَوَجَدَ اللَّهَ عِندَهُ فَوَفَّاهُ حِسَابَهُ ۗ وَاللَّهُ سَرِيعُ الْحِسَابِ ۔

آیت 39: کفار کے اعمال کی مثال کس سے دی گئی؟

ترجمہ

”اور جن لوگوں نے کفر کیا ان کے اعمال چٹیل میدان میں سراب (چمکتی ریت) کی مانند ہیں جسے پیاسا پانی سمجھتا ہے، یہاں تک کہ جب وہ اس کے پاس پہنچتا ہے تو اسے کچھ بھی نہیں پاتا اور وہاں وہ اللہ کو موجود پاتا ہے، پس اللہ اس کا پورا حساب چکا دیتا ہے، اور اللہ جلد حساب کرنے والا ہے۔“

وضاحت

جواب اللہ تعالیٰ نے اس آیت میں کافروں کے اچھے کاموں (جیسے خیرات یا انسانی ہمدردی) کو ”سراب“ سے تشبیہ دی ہے۔ جیسے صحرا میں پیاسا دور سے چمکتی ریت کو پانی سمجھ کر دوڑتا ہے مگر قریب جانے پر مایوسی ہوتی ہے، اسی طرح کافر قیامت کے دن اپنے اعمال کے ثواب کی امید رکھے گا مگر ایمان نہ ہونے کی وجہ سے اس کے اعمال رائیگاں جائیں گے اور وہاں وہ اپنے گناہوں کی سزا پائے گا۔

10 تفصیلی جوابات

وَيَقُولُونَ آمَنَّا بِاللَّهِ وَبِالرَّسُولِ وَأَطَعْنَا ثُمَّ يَتَوَلَّىٰ فَرِيقٌ مِّنْهُم مِّن بَعْدِ ذَٰلِكَ ۚ وَمَا أُولَٰئِكَ بِالْمُؤْمِنِينَ ۔

آیت 47: ترجمہ و مفہوم بیان کریں ۔

ترجمہ

”اور وہ کہتے ہیں کہ ہم اللہ اور رسول پر ایمان لائے اور ہم نے اطاعت قبول کی، پھر اس کے بعد ان کا ایک گروہ (حکمِ الٰہی سے) منہ پھیر لیتا ہے، اور یہ لوگ (حقیقت میں) مومن نہیں ہیں۔“

مفہوم

جواب اس آیت میں منافقین کے جھوٹے دعوؤں کو بے نقاب کیا گیا ہے۔ وہ زبان سے تو ایمان اور اطاعت کا دم بھرتے ہیں لیکن جب عملی زندگی میں یا کسی معاملے کے فیصلے میں رسول اللہ ﷺ کے حکم پر چلنے کا وقت آتا ہے تو وہ پیٹھ پھیر کر بھاگ جاتے ہیں، جس سے ثابت ہوتا ہے کہ ان کے دل ایمان سے خالی ہیں۔

11 تفصیلی جوابات

يَا أَيُّهَا الَّذِينَ آمَنُوا لِيَسْتَأْذِنكُمُ الَّذِينَ مَلَكَتْ أَيْمَانُكُمْ وَالَّذِينَ لَمْ يَبْلُغُوا الْحُلُمَ مِنكُمْ ثَلَاثَ مَرَّاتٍ ۚ مِّن قَبْلِ صَلَاةِ الْفَجْرِ وَحِينَ تَضَعُونَ ثِيَابَكُم مِّنَ الظُّهِيرَةِ وَمِن بَعْدِ صَلَاةِ الْعِشَاءِ ۚ ثَلَاثُ عَوْرَاتٍ لَّكُمْ...

آیت 58 میں کیا خانگی آداب اور ہدایات دی گئی ہیں؟۔

ترجمہ

”اے ایمان والو! تمہارے غلام و لونڈیاں اور تمہارے وہ بچے جو ابھی بلوغت کو نہیں پہنچے، تین اوقات میں (تمہارے پاس آنے کے لیے) اجازت لیا کریں: فجر کی نماز سے پہلے، اور دوپہر کے وقت جب تم (آرام کے لیے) اپنے کپڑے اتارتے ہو، اور عشاء کی نماز کے بعد۔ یہ تینوں تمہارے لیے پردے (اور خلوت) کے اوقات ہیں...“

بیان کردہ ہدایات:

1 خلوت کے اوقات کا احترام — بچوں اور خادموں کو سکھایا جائے کہ وہ والدین یا بڑوں کے کمروں میں ان تین مخصوص اوقات میں بغیر دستک یا اجازت کے داخل نہ ہوں۔

2 بچوں کی تربیت — بلوغت سے پہلے ہی بچوں میں حیا اور پردے کے شعور کی تربیت دی جائے۔

3 گھریلو آزادی — ان تین اوقات کے علاوہ گھر کے لوگ ایک دوسرے کے پاس بلا جھجک آ جا سکتے ہیں کیونکہ وہ ضرورت کے تحت بار بار چکر لگاتے ہیں۔

12 تفصیلی جوابات

وَالْقَوَاعِدُ مِنَ النِّسَاءِ اللَّاتِي لَا يَرْجُونَ نِكَاحًا فَلَيْسَ عَلَيْهِنَّ جُنَاحٌ أَن يَضَعْنَ ثِيَابَهُنَّ غَيْرَ مُتَبَرِّجَاتٍ بِزِينَةٍ ۖ وَأَن يَسْتَعْفِفْنَ خَيْرٌ لَّهُنَّ ۗ وَاللَّهُ سَمِيعٌ عَلِيمٌ ۔

آیت 60 میں بوڑھی عورتوں کے لیے کیا رخصت ہے؟

ترجمہ

”اور وہ بوڑھی خانہ نشین عورتیں جو نکاح کی امید (یا خواہش) نہیں رکھتیں، ان پر اس بات میں کوئی گناہ نہیں کہ وہ اپنے (اضافی اوپر والے) کپڑے اتار کر رکھ دیں بشرطیکہ وہ اپنی آرائش (اور زینت) کی نمائش کرنے والی نہ ہوں، اور اگر وہ اس سے بھی بچیں (اور پورا حجاب رکھیں) تو یہ ان کے لیے زیادہ بہتر ہے، اور اللہ سب کچھ سننے اور جاننے والا ہے۔“

بیان کردہ رخصت:

1 بڑی عمر کی (خانہ نشین) بوڑھی خواتین — جو عام طور پر نکاح کی عمر سے گزر چکی ہوں، انہیں یہ رخصت ہے کہ وہ نامحرموں کے سامنے چادر یا برقع جیسا اضافی بیرونی لباس اتار سکتی ہیں۔

2 شرط — اس رخصت کے باوجود ان کے لیے بناؤ سنگھار کی نمائش کرنا ممنوع ہے۔ اگر وہ احتیاطاً چادر اوڑھے رکھیں تو یہ ان کے تقویٰ کے لیے زیادہ بہتر ہے۔

سرگرمیاں

13 سرگرمیاں

سورہ النور میں مومنین اور منافقین کا طرزِ عمل (نکات کی شکل میں)

1 خصوصیات — مومنین کا طرزِ عمل — منافقین کا طرزِ عمل

2 اطاعت و فرمانبرداری — اللہ اور رسول کا حکم سنتے ہی ”سمعنا و اطعنا“ (ہم نے سنا اور مانا) کہتے ہیں۔ — زبان سے دعویٰ کرتے ہیں لیکن عمل کے وقت پیٹھ پھیر لیتے ہیں۔

3 عدالتی فیصلے — جب تنازع ہو تو خوشی سے اللہ اور رسول کے فیصلے کو قبول کرتے ہیں۔ — اگر فیصلہ اپنے حق میں نہ ہو تو منہ موڑ لیتے ہیں اور بھاگتے ہیں۔

4 دنیاوی مصروفیات — تجارت اور کاروبار انہیں نماز اور ذکرِ الٰہی سے غافل نہیں کرتا۔ — دنیاوی مفادات اور جان و مال کا خوف انہیں احکامِ الٰہی سے دور رکھتا ہے۔

5 معاشرتی حیا — معاشرے میں پاکدامنی، عفت اور حیا کے احکام پر سختی سے عمل کرتے ہیں۔ — معاشرے میں بے حیائی اور فحاشی پھیلانے کو پسند کرتے ہیں۔

14 سرگرمیاں

آیت 61: معذورین کو رشتہ داروں کے گھروں سے کھانا کھانے کی رخصت

آیت 61 میں اللہ تعالیٰ نے نابینا، لنگڑے، بیمار اور عام مسلمانوں کی جھجھک دور کرتے ہوئے درج ذیل گھروں سے بلا اجازت یا مل کر کھانا کھانے کی اجازت (رخصت) دی ہے:

1 اپنے ذاتی گھروں سے۔

2 اپنے والدین (باپ دادا) کے گھروں سے۔

3 اپنی ماؤں (اور دادیوں) کے گھروں سے۔

4 اپنے بھائیوں کے گھروں سے۔

5 اپنی بہنوں کے گھروں سے۔

6 اپنے چچاؤں کے گھروں سے۔

7 اپنی پھوپھیوں کے گھروں سے۔

8 اپنے ماموؤں کے گھروں سے۔

9 اپنی خالاؤں کے گھروں سے۔

10 جن گھروں کی چابیاں (نگرانی) تمہارے اختیار میں ہوں۔

11 اپنے قریبی اور مخلص دوستوں کے گھروں سے۔

15 سرگرمیاں

اللہ کے نور کی مثال (وضاحت)

سورہ النور کی مشہور آیت نمبر 35 (آیتِ نور) میں اللہ تعالیٰ نے اپنے نورِ ہدایت کی مثال بیان فرمائی ہے:

1 اللہ تعالیٰ نے فرمایا کہ اس کے نور کی مثال ایسی ہے جیسے ایک دیوار کا طاقچہ (مِشکوٰۃ) ہو، جس کے اندر ایک چراغ رکھا ہو۔

2 وہ چراغ شیشے کی فندوس (قندیل) میں ہو، اور وہ شیشہ چمکتے ہوئے ستارے کی طرح روشن ہو۔

3 اس چراغ میں زیتون کا ایسا مبارک تیل استعمال ہو رہا ہو جو نہ خالص مشرقی ہو نہ مغربی (یعنی اسے دن بھر بھرپور دھوپ ملتی ہو جس سے وہ نہایت شفاف ہو)۔ اس کا تیل اتنا مصفا ہو کہ آگ چھوئے بغیر ہی خود بخود جلنے کو تیار ہو۔

جواب تفسیر: یہ مثال انسان کے مومن دل اور اس میں موجود اللہ کی ہدایت (ایمان) کی ہے۔ مومن کا دل پاکیزہ طاقچے کی طرح ہے، اس کی فطرتِ سلیمہ زیتون کے صاف ستھرے تیل جیسی ہے، اور جب اس پر وحیِ الٰہی کا چراغ جلتا ہے تو وہ ”نور علیٰ نور“ (روشنی پر روشنی) بن جاتا ہے

16 سرگرمیاں

کفار اور منافقین کے لیے بیان کی گئی مثالیں

سورہ النور میں کفار کے اعمال اور حالتِ گمراہی کے لیے دو بنیادی مثالیں دی گئی ہیں:

1 سراب کی مثال (آیت 39) — جیسا کہ اوپر وضاحت کی گئی، کافر کے نیک اعمال صحرا کے سراب کی طرح بے حقیقت ہیں، جن کا آخرت میں کوئی وجود نہیں ہوگا۔

2 گہرے سمندر کے اندھیروں کی مثال (آیت 40) — اللہ فرماتا ہے کہ کافر کی حالت ایسی ہے جیسے ایک عمیق اور گہرے سمندر میں اندھیرا ہو، جس کے اوپر ایک موج ہو، اس کے اوپر ایک اور موج ہو اور اس کے اوپر سیاہ بادل چھائے ہوئے ہوں۔ یعنی اندھیروں پر اندھیرے۔ اگر کوئی اپنا ہاتھ بھی نکالے تو اسے دیکھ نہ پائے۔ تفسیر — یہ منافق اور کافر کے دل کی مثال ہے جس پر کفر، شک اور نفاق کے پے در پے اندھیرے چھائے ہوتے ہیں، اور جسے اللہ نورِ ایمان نہ دے اسے کہیں سے روشنی نہیں مل سکتی۔

17 سرگرمیاں

پانی کی اہمیت اور حفاظت کے اقدامات

قرآن مجید میں پانی کو تمام جانداروں کی زندگی کا بنیادی ذریعہ قرار دیا گیا ہے (وجعلنا من الماء کل شیء حی)۔ اس کی حفاظت کے لیے درج ذیل اقدامات کیے جا سکتے ہیں:

1 گھریلو سطح پر بچت — وضو کرتے وقت، نہاتے ہوئے اور برتن دھوتے وقت نلکا کھلا نہ چھوڑیں اور ضرورت کے مطابق پانی استعمال کریں۔

2 بارش کے پانی کا ذخیرہ — گھروں اور عمارتوں کی چھتوں پر ایسا نظام بنایا جائے جس سے بارش کا پانی ضائع ہونے کے بجائے زیرِ زمین ٹینکوں میں جمع کیا جا سکے۔

3 شجرکاری (درخت لگانا) — زیادہ سے زیادہ درخت لگائے جائیں تاکہ زیرِ زمین پانی کی سطح برقرار رہے اور ماحولیاتی نظام متوازن ہو۔

4 آلودگی سے بچاؤ — کارخانوں کے کیمیکل زدہ پانی اور گندگی کو صاف پانی کے ذخائر (دریاؤں، نہروں) میں شامل ہونے سے روکا جائے۔

5 جدید طریقۂ آبپاشی — زراعت میں روایتی طریقوں کے بجائے ڈرپ اریگیشن (قطرہ قطرہ آبپاشی) یا اسپرنکلر سسٹم اپنایا جائے تاکہ پانی کم سے کم ضائع ہو۔

شان نزول

18 شان نزول

واقعہ افک اور آیاتِ براءت (آیت 11 تا 20)

جواب شان نزول: یہ آیات غزوہ بنی المصطلق (5 ہجری) کے موقع پر نازل ہوئیں جب واپسی کے سفر میں ام المومنین حضرت عائشہ صدیقہ رضی اللہ عنہا کا ہار گم ہو گیا تھا اور وہ قافلے سے پیچھے رہ گئیں۔ صفوان بن مہطل رضي اللہ عنہ نے انہیں اکیلے پا کر اپنی اونٹنی پر سوار کیا اور مدینہ لے آئے۔ اس واقعے کو بنیاد بنا کر منافقین (عبد اللہ بن ابی اور اس کے ساتھیوں) نے تہمت لگائی، جس پر اللہ تعالیٰ نے سورہ نور کی ابتدائی آیات نازل فرما کر حضرت عائشہ کی براءت کا اعلان کیا اور بہتان تراشوں کے لیے سزا مقرر کی۔

19 شان نزول

زانی اور بدکار عورت سے نکاح کا حکم (آیت 3)

جواب شان نزول: تفاسیر (جیسے تفسیر ابن کثیر) میں منقول ہے کہ مدینہ کے ایک غریب صحابی مرثد بن ابی مرثد غنوی نے ”عناق“ نامی ایک بدکار مشرک عورت سے اجازت چاہی یا نکاح کا ارادہ کیا۔ جب انہوں نے نبی کریم ﷺ سے اس کا تذکرہ کیا، تو یہ آیت نازل ہوئی کہ زانی مرد اور زانی عورت کا نکاح صرف زانی یا مشرک سے ہی ہو سکتا ہے اور مومنین پر بدکار عورتوں سے نکاح حرام قرار دیا گیا۔

20 شان نزول

لعان کا حکم (آیت 6 تا 9)

جواب شان نزول: اس کا سبب نزول حضرت ہلال بن امیہ کا واقعہ ہے، جنہوں نے اپنی بیوی کو ایک شخص (شريك بن سحماء) کے ساتھ بدکاری کرتے ہوئے اپنی آنکھوں سے دیکھا۔ جب انہوں نے نبی کریم ﷺ سے شکایت کی تو آپ ﷺ نے گواہ لانے کا فرمایا، ورنہ پیٹھ پر حد لگنے کا حکم تھا۔ اس پر یہ آیات نازل ہوئیں جن میں ”لعان“ کا طریقہ بیان کیا گیا کہ اگر شوہر کے پاس چار گواہ نہ ہوں تو وہ چار بار قسمیں کھائے اور پانچویں بار اپنے پر لعنت ڈالے۔

21 شان نزول

حضرت ابو بکر اور مسطح بن اثاثہ کا واقعہ (آیت 22)

جواب شان نزول: جب واقعہ افک میں مسطح بن اثاثہ (جو حضرت ابو بکر کے رشتہ دار اور غریب مہاجر تھے) بھی شامل ہو گئے، تو حضرت ابو بکر نے قسم کھائی کہ اب وہ مسطح کو کوئی مالی مدد یا خرچ نہیں دیں گے۔ اس پر آیت نازل ہوئی: ”اور تم میں سے فضل اور وسعت والے لوگ رشتہ داروں، مساکین اور مہاجرین کو دینے سے قسم نہ کھائیں...“۔ یہ سن کر حضرت ابو بکر نے فرمایا کہ میں اللہ کی قسم! یہ پسند کرتا ہوں کہ اللہ مجھے معاف کر دے اور میں نے مسطح کی امداد بحال کر دی۔

یہ صفحہ خیبر پختونخوا ٹیکسٹ بک بورڈ کی 2024 مارکنگ اسکیم سے جانچا گیا۔